கனி அப்டேட்ஸ் – 36

Nov 2017

எவ்வளவு தூரத்துக்கு தகவல் தொடர்பாற்றல் வளர்கிறதோ அவ்வளவுக்கு இந்தப் பயலுக்கு ஞாபக மறதி கூடி வருகிறது. எதோ இந்த மட்டுக்கும் கூடுதலாக நான்கு வார்த்தை பேசுகிறானே என்று மகிழ்வதா,  அல்லது இருந்த வெகுசில வலிமைகளில் ஒன்றான நினைவாற்றல் மட்டுப் படுவதை நினைத்து கவலைப்படுவதா என்று குழம்பித் திரிந்து கொண்டிருந்தோம்.

ஆனால் கட்டாயம் அதெல்லாம் சந்தோஷப் பட வேண்டிய விஷயம்தான் என்று நேற்றுப் புரிய வைத்தான் கனி. ரொம்பவும் குட்டிப் பிள்ளையாக இருக்கும் போது எந்தெந்த மிருகம் எப்படியெப்படி கத்தும் என்று சொல்லிக் கொடுப்போம் இல்லயா, அப்படி இவனுக்கும் சொல்லிக் கொடுத்திருந்தோம். அதெல்லாம் நினைவிருக்கிறதா பார்க்கலாம் என்று வரிசையாக ஒவ்வொன்றாய் கேட்டுக் கொண்டு வந்தேன் -அவனும் ஒழுங்காய் பதில் சொல்லிக் கொண்டு வந்தான்.

“யானை எப்படிடா கத்தும்?”

ஆழ்ந்த யோசனை.

அடிவயிற்றிலிருந்து சத்தமாக நீட்டி முழக்கி “யா…..னை” என்றான்.

பிளிறலோசை மறந்தாலும்  சமாளிக்கத் தெரிந்திருக்கிறதே என்று நினைத்து சிரித்துக் கொண்டிருக்கிறோம்.

Advertisements
Posted in கனி அப்டேட்ஸ், குழந்தை வளர்ப்பு | Tagged , | Leave a comment

கனி அப்டேட்ஸ் – 35

2014 Feb

பக்கத்து கோவிலில் ராகுகால பூஜைக்கென ஒரு மகளிர் மண்டலி ஒன்று உண்டு. செவ்வாய் & வெள்ளிக் கிழமைகளில் விஸ்தாரமான ஸ்லோக பாராயணங்கள் நடக்கும். ராகு காலத்திற்கான ஸ்லோகங்கள் மட்டுமல்லாமல் லலிதா சகஸ்ரநாமம் தொடங்கி பல்வேறு பாடல்கள் பாடுவார்கள். கிட்டத்தட்ட ஒரு மணி நேரத்திற்கு மேலாகவே பாடல்கள் போகும். பாடல் முடியப் போகும் நேரத்தில் குருக்கள் வந்து அர்ச்சனை செய்து தீபாராதனை காட்டுவார். கடைசியாக ”அன்னை அன்னை அன்பினுக்கு மங்களம்” எனும் மங்கலப் பாடல் பாடி நிறைவு செய்வார்கள்.

சித்தி ஊரிலிருக்கையில் கனியையும் இந்த நிகழ்வுக்கு அழைத்துக் கொண்டு போவார். செவ்வாய் & வெள்ளி இரண்டு நாட்களுமே இந்த பூஜைகள் நடக்கும் நேரம் வழக்கமான வழிபாட்டு நேரத்திற்கு முன்பின்னாக இருப்பதால் கூட்டமே இல்லாத விஸ்தாரமான பிரகாரத்தில் கனி நன்றாக ஓடி விளையாடுவான். சித்தி மும்மரமாக பாடல்கள் பாடிவிட்டு கிளம்பும் போது ஒரு குரல் கொடுத்தால் ஓடி வந்து ஒட்டிக் கொள்ளுவான். சென்ற செவ்வாய் அன்று அதே போல பூஜைக்கு போய் வந்த சித்தி என்னமோ இன்னிக்கு ரொம்ப சிணுங்கிட்டே இருந்தான், பாதிலயே வந்துட்டேன் என்றார். சரி, ஒவ்வொருநாள் அப்படித்தான் இருக்கும் விடுங்க என்றேன்.

இன்று அந்த மகளிர் மண்டலியின் முக்கியப் பங்கு வகிக்கும் பெண்மணியை கடையில் பார்த்தேன். முகமன்கள் முடிந்த பின் ”முந்தாநாள் உன் புள்ளை என்ன பண்ணினான் தெரியுமா, பாட ஆரம்பிச்ச ரெண்டாவது நிமிஷம் என்கிட்ட வந்து அன்னை அன்னை அன்பினுக்கு மங்களம்னு திரும்பத் திரும்ப சொல்றான். அதாவது உடனே மங்களம் பாடி முடின்றான்” என்றார். சிரித்துக் கொண்டே சொன்னாலும் லேசான ஆதங்கத்தோடுதான் பேசுகிறார் என்று புரிந்ததால் என்ன பதில் சொல்வது என்று தெரியாமல் நான் முழிக்க அவர் அடுத்து சொன்னதுதான் ஹைலைட் – உன் புள்ளைக்கு பேச்சு வரலன்னு நீதான் கவலைப் படற, அவனுக்கு தேவைப்படறப்ப தேவையானதை கரெக்டா பேசிடறானே என்றார்.

Posted in கனி அப்டேட்ஸ், குழந்தை வளர்ப்பு | Tagged , | 1 Comment

கனி அப்டேட்ஸ் – 34

2013 Oct

மடிக்கணிணியில் வேலையில் ஆழ்ந்திருந்த என்னிடம் பில்டிங்க் ப்ளாக் பையைக் கொண்டுவந்து கொடுத்து திறந்து கொடுக்க சொன்னான். கொடுத்துவிட்டு என் வேலையைத் தொடர்ந்தேன்.  ஐந்தே நிமிடத்தில் என்னிடம் வந்து ட்ரெயின் என்றான். நிமிர்ந்து பார்த்தால் இதை செய்து அடுக்கியிருக்கிறான்.

Posted in கனி அப்டேட்ஸ், குழந்தை வளர்ப்பு | Tagged , | 2 Comments

கனி அப்டேட்ஸ் – 33

2015 Jan

எங்களுக்கு பண்டிகைகளில் பொங்கலும் திருவிழாக்களில் புத்தகக் கண்காட்சியும் முக்கியமானவை. கனி பிறந்த வருடம் கூட நான் புத்தக கண்காட்சியைத் தவற விட்டதில்லை. சென்ற வருடம் முதல் அவனையும் அழைத்துச் செல்ல ஆரம்பித்திருக்கிறோம். சென்ற வருடம் வெறுமனே நடந்தும், ஓடியும் களைத்துப் போனவனாக திரும்பினான். இந்த வருடமும் அப்படியே இருப்பான் என்று நினைத்துத்தான் அழைத்துப் போனோம்.

ஒவ்வொரு கடையிலும் நாங்கள் தேடியெடுத்து புத்தகங்கள் வாங்குவதைப் பார்த்துக் கொண்டிருந்தவன் திடீரென நடைபாதையில் ஓரிடத்தில் சத்தியாகிரகம் பண்ண ஆரம்பித்தான். அது குழந்தைகளுக்கான புத்தகக் கடை வாசல். ஆனால் வருடம் முழுவதுமே அவனுக்குத் தேவைக்கு மேல் புத்தகங்கள் வாங்கி அடுக்கியிருக்கிறோம் என்பதால் எங்களுக்கு அங்கே ஒன்றும் வாங்க வேண்டியிருக்கவில்லை. கடை வாசலில் என் கையைப் பிடித்து இழுத்து பிரேக் அடித்து நிற்க வைத்ததோடு உயிர்மெய்யெழுத்து புக் என்று வேறு சொன்னான். அதாவது அவனுக்கு எழுத்துக்கள் கொண்ட புத்தகம் வேண்டுமாம். அவன் கேட்ட மகிழ்விற்காகவே ஏற்கனவே வீட்டில் எக்கச்சக்க எழுத்துப் புத்தகங்கள் இருந்தாலும் பரவாயில்லை என்று ஆங்கிலம் தமிழ் இரண்டிலுமே ஒவ்வொரு புத்தகத்தை வாங்கி அவன் மாட்டியிருந்த சிறு பைக்குள்ளேயே வைத்து விட்டோம். பின்னே அவங்கவங்களுக்கு வேண்டியதை அவங்கவங்களாத்தானே வாங்கிக்கணும்?

தம்பொருள் என்பதம் மக்கள் அவர்பொருள்
தந்தம் வினையான் வரும்

Posted in கனி அப்டேட்ஸ், குழந்தை வளர்ப்பு | Tagged , | 1 Comment

கனி அப்டேட்ஸ் – 32

2019, July

எழுத்துக்களைப் போலவே எண்களின் மீதும் கனிக்கு பிரேமை அதிகம். இரண்டரை வயதிலேயே தமிழ் & ஆங்கிலம் இரண்டிலும் 1000 வரை எண்களின் பெயர்களைச் சொல்வான். எதைச் சொல்லித் தந்தாலும் பிடித்துக் கொள்கிறானே என்று ஏறுவரிசை போலவே இறங்கு வரிசையை சொல்லித் தந்ததும் அதையும் உடனே கற்றுக் கொண்டான். பிறகு எண்களின் மடங்குகளை அறிமுகம் செய்தேன். 2, 4, 6 என்று முதல் முறை சொன்னதுமே கிடு கிடுவென 1000 வரை இரட்டை எண்களைச் சொன்னான். 5, 10 கூட பரவாயில்லை, எல்லோருக்குமே எளிதுதான். 3, 7 என்றெல்லாம் வரிசையை ஆரம்பித்தால் கூட வெகு லாவகமாய் அதைத் தொடர்வான். எனக்குத்தான் ஒரு கட்டத்திற்கு மேல் அவன் சொல்வதை சரி பார்க்கக் கூட முடியாது – பின்னே நமக்கு எல்லா வாய்ப்பாட்டிலும் 16 வரைதானே தெரியும்?

ஆனாலும் இந்த மாதிரியான திறன்களை பெரிதாக்கிக் காட்டி, அவனை ஒரு காட்சிப் பொருளாக்குவதில் எங்களுக்கு உடன்பாடில்லை. ஆட்டிச நிலையாளர்களுக்கு வகை மாதிரி(Pattern) புரிந்து கொள்வதிலும், அவற்றைப் பின்பற்றுவதிலும் அபார உற்சாகம் இருக்கும். அதனால்தான் இதையெல்லாம் செய்கிறான் என்பதை உணர்ந்திருந்ததால் நாங்கள் அவனிடம் அதிக எதிர்பார்ப்புகளை வைத்துக் கொள்ளவில்லை. என்றாலும் மொழி போலவே கணிதமும் அவனுக்கு நன்றாக வரும் என்ற சின்ன நம்பிக்கை எனக்கு இருந்தது – அவ்வளவு கூட மூட நம்பிக்கை இல்லாவிட்டால் அம்மாவாக வாழ்வது எப்படி?

கூட்டல் வரை நன்றாகச் செய்தவன் ஒரு சடன் பிரேக் போட்டான். திடீரென கணக்கு, பிணக்கு, ஆமணக்கு என்றடுக்கும் சுப்பைய்யாவின் பேரன் அவதாரத்திற்கு மாறிவிட்டான். சரி, மற்ற நான்கு பாடங்களையும் எழுத வைக்கவே நுரை தள்ளுகிறதே, இது போகட்டும் என்று இரண்டொரு வருடங்கள் விட்டுவிட்டேன். இனி பொறுப்பதில்லை என்று சென்ற கோடை விடுமுறையில் முழுமூச்சாக கணக்கு போட்டே ஆக வேண்டும் என்று அவனோடு மல்லுக்கு நின்றதில் இப்போது பெருக்கல், கழித்தல் என ஒரளவு வண்டி மீண்டும் வேகம் பிடித்திருக்கிறது.

இப்போதும் கணக்கில் இருக்கும் எரிச்சலை விதம் விதமாகக் காட்டிக் கொண்டுதான் இருக்கிறான். நான் தமிழில் சொன்னால் அவன் ஆங்கிலத்தில் சொல்வது, நான் ஆங்கிலத்தில் சொன்னால் அவன் தமிழில் பதில் சொல்வது என்பதெல்லாம் எப்போதுமே அவன் வெறுப்பேற்றச் செய்வதுதான். அதாவது நான் Two Twos are என்றால் அவன் நான்கு என்பான். அல்லது ரெண்டு ரெண்டு நாலு என்று சொல்வான். ஏழெட்டு என்று நான் கேட்டா seven eights are fifty six என்பான். ஒரு சில மைக்ரோ நொடிகள் செலவிட்டுத்தான் அவன் சொல்வதை சரிபார்க்கவே முடியும். சரி, இது போன்ற சில்லரை விஷயங்களுக்கெல்லாம் கோபப் படக் கூடாது என்று எனக்கு நானே நல்லபுத்தி சொல்லிக் கொண்டு சாந்த சொரூபியாய் வேலையைத் தொடர்வேன்.

போன வாரத்தில் இரண்டு இலக்கப் பெருக்கலில் carry over அறிமுகப் படுத்தினேன். ஏற்கனவே ரெண்டு இலக்கம் பெருக்கணும், இதில் இன்னொரு எண்ணை ஞாபகம் வச்சு கூட்ட வேறு சொல்கிறாளே இந்த இரக்கமற்றவள் என்று நினைத்தான் போல. ஏழு எட்டூஸ் ஆர் ஐம்பத்தி ஆறு என்றான். என்ன சொல்கிறான் இவன் என்று ஒரு நிமிடம் தலை சுற்றிப் போனேன். ஆனாலும் சற்றும் மனந்தளராத விக்கிரமாதித்தயளாக கணக்கை போட வைத்து முடித்தேன் – அடேஏஏஏஏய், உனக்கு கணக்கு சொல்லித் தரதுக்குள்ள எனக்கு தமிழ், இங்கிலீஷ் எல்லாத்தையுமே மறக்க வச்சுருவ போலிருக்கே ராசா என்று மனதுக்குள் கதறிக் கொண்டேதான்.

Posted in கனி அப்டேட்ஸ், குழந்தை வளர்ப்பு | Tagged , | 1 Comment

கனி அப்டேட்ஸ் – 31

2012 Dec

கனிக்கு பேனா அல்லது பென்சில் பிடித்து எழுதுவதை இன்னும் ஒரு இரண்டு வருடத்துக்காவது தள்ளிப் போடும் எண்ணத்தில் இருக்கிறோம்.  வீட்டில் கரும்பலகையும் சாக்பீஸ்களும் உண்டு. வண்ணமடிக்க க்ரேயான்கள் உண்டு. இவற்றில் மட்டுமே அவனுக்கான எழுத்துப் பயிற்சிகள் – அவனுக்குமே புத்தகத்தை எடுத்து வைத்து படிப்பதில் அல்லது படம் பார்ப்பதில் உள்ள ஆர்வம் எழுதுவதில் இல்லையென்றே சொல்லவேண்டும்.

ஆனால் எழுத்துக்களை புரிந்து கொள்ளவும் படிக்கவுமாக மரப்பலகையில் பதித்தது போன்ற ஏபிசிடி கேப்பிட்டல் மற்றும் சின்ன எழுத்துக்கள் கொண்டது ஒன்றும், ப்ளாஸ்டிக்கிலான ஏபிசிடி செட் இரண்டும் வாங்கிப் போட்டிருக்கிறோம்.அவற்றால் அவருக்கு பரிச்சயமான எல்லா வார்த்தைகளையும் அடுக்கிப் பார்ப்பார். ஏற்கனவே சொன்னது போல் மிகக் கறாரான செம்மையாளர்(perfectionist) என்பதால் ப்ளாஸ்டிக் எழுத்துக்களையும், மர எழுத்துக்களையும் கலந்து அடுக்க மாட்டார். எனவே நிறைய வார்த்தைகளை அடுக்கும் போது எழுத்துக்கள் பற்றாக்குறையாகும். முடிந்த அளவு சில தந்திரங்கள் மூலம் சமாளிப்பார். ரொம்ப முடியாத பட்சத்தில் மட்டும் எழுத்துக்களை கடன் வாங்கிக் கொள்வார். அவர் செய்யும் சில சமாளிப்புகள் எனக்கு எப்போதும் ஆச்சரியம் தருவன.

குறிப்பு: இவை மறுதலை(vice versa)யாகவும் பயன்படுத்தப்படும் என்று அறிக.

1. M தேவைப்படும் இடங்களில் W வைத் தலைகீழாக வைத்துக் கொள்வார்.
2. N தேவைப்படும் இடங்களில் Z ஐ பக்கவாட்டில் வைத்துக் கொள்வார்.
3. ஸ்மால் லெட்டர் q, b போன்றவற்றைத் திருப்பி போட்டு p செய்வார்.
4.கேப்பிடல் ஐ – I ஸ்மால் லெட்டரில் வரும் எல் – l ஆக உபயோகிக்கப்படும்.
5. எண்களில் 2 க்குபதில் எழுத்திலிருந்து Z உபயோகிப்பார். அது போலவெ 3 ற்கு மாற்றாக இடவலமாக மாற்றப் பட்ட E, பக்கவாட்டில் அடுக்கப்பட்ட W போன்றவை உபயோகிக்கப் படும். 5 ற்கு S பயன்படும்.

நாங்களிருவருமே SAMSUNG மொபைல்தான் உபயோகிக்கிறோம். ஒரு முறை சாம்சங் என்பதை படித்துக் காண்பித்து ஸ்பெல்லிங்கும் சொன்னதும் விறுவிறுவென தன் எழுத்துக்களால் அடுக்கத் தொடங்கினான். சரியாக அடுக்கியிருந்தான் என்றாலும் ஏதோ ஒரு வேறுபாடு இருப்பதாக தோன்றிக் கொண்டிருந்தது. சிறிது நேரம் கழித்தே அது என்னவென புரிபட்டது. SAMSUNG கம்பெனி தன் பெயரை பெரும்பாலும் A வில் வரும் நடு இணைப்பு இல்லாமலே எழுதும் என்பதை நீங்கள் கவனித்திருக்கலாம். எனவே கனி தானும் அப்படியே எழுதியிருந்தான் – எப்படியெனில் Aவிற்கு பதிலாக Vஐத் தலைகீழாக வைத்து அதே வார்த்தையை உருவாக்கியிருந்தான்.

Hospital-லில் பிள்ளையை மாற்றிவிட்டார்களோ என்ற எண்ணம் மட்டும் அடிக்கடி வருவதை தடுக்க முடியவில்லை )))

 

Posted in கனி அப்டேட்ஸ், குழந்தை வளர்ப்பு | Tagged , | 1 Comment

கனி அப்டேட்ஸ் – 30

2017 June

தஞ்சை -கும்பகோணம் சாலையை நெடுஞ்சாலை என்றால் அதில் பெயர்ந்து கிடக்கும் ஜல்லிக் கற்கள் கூட சிரிக்கும். சமதளத்திலேயே ஏகப்பட்ட கொண்டை ஊசி வளைவுகள், எதிரெதிரே இரண்டு பஸ் வந்தாலே வேகம் குறைத்து கவனமாய் தாண்ட வேண்டிய அவசியம், கொஞ்சம் ஓரம் போனால் பஸ் வீட்டு திண்ணைகளில் ஏறிவிடும் அபாயம் என்று அந்த சாலையின் சிறப்பம்சங்கள் சொல்லி மாளாது. அப்போதெல்லாம் விபத்துகள் ரொம்ப சர்வ சாதாரணம்.

இளங்கலை 3 + முதுகலை 2.5னு 5.5 வருடமும் அம்மாவுக்கு வயிற்றில் கட்டிய நெருப்பு என்னுடைய தினசரிப் பயணம். தினமும் கிளம்பும் போதெல்லாம் மறக்காம “விபூதி குங்குமம் இட்டுண்டு கிளம்பு” என்று என்னிடமும் “பாவடைராயா(எங்கள் குலதெய்வக் கோவிலின் பரிவார தேவதைகளில் ஒன்று, எங்கள் குடும்பத்தினருக்கு இஷ்ட தெய்வம்) பின்னோட போய் காப்பாத்துடா” என்று சாமி படம் பார்த்தும் சொல்வது அவரது வழக்கம். பஸ்ஸுக்கு அவசரம் இல்லையென்றால் “அவனுக்கு டிக்கெட் நான் வாங்கணுமா, இல்ல அவனே பாத்துப்பானா” என்று கேட்டு அம்மாவின் வாயைக் கிளறி கிளம்பும் நேரத்தில் ஸ்பெஷல் அர்ச்சனைகளைப் பெற்றுக் கொண்டு கிளம்புவது எனக்கு பிரியமான பொழுது போக்கு.

இதெல்லாம் இப்ப ஏன் திடீர்னு எனக்கு நினைவுக்கு வரணும்? எங்கள் வீட்டருகில் ஒரு சின்ன அம்மன் கோவில் உண்டு. ஆரம்பத்தில் ஏரிக்கரை வேப்பமரத்தினடியில் சில நாகப் பிரதிஷ்டைகளும், கழுத்து வரையிலான அம்மன் சிலையும் மட்டும் இருந்தது. நூலகம் செல்லும் போதுகளில் பார்த்து கன்னத்தில் போட்டுக் கொண்டு போனதுண்டு. இப்போது நாகப்பிரதிஷ்டைகள் எல்லாம் அப்படியே இருக்க, அம்மனை மட்டும் பக்கத்தில் சின்ன கான்கீரிட் கட்டத்தில் டைல்ஸ் புடைசூழ குடியமர்த்தியிருக்கிறார்கள். கூடுதலாக முழு உருவச் சிலையும் பிரதிஷ்டை செய்திருக்கிறார்கள். முன்பு பெயர்ப் பலகை எதுவும் இருந்ததில்லை. இப்போதோ ஸ்ரீதேவி கருமாரியம்மன் கோவில் என்று அந்த ஸ்தலம் அழைக்கப் படுகிறது.

கனியை அந்த வழியாகத்தான் தினமும் பள்ளியில் கொண்டு போய் விடுகிறேன். சமீபமாக இரண்டொரு நாளாகத்தான் எனக்கே உரைக்கிறது – அந்த இடத்தை தாண்டும் போதெல்லாம் ”அம்மா கருமாரித் தாயே, குழந்தைய காப்பத்தும்மா” என்ற வேண்டுதல் என் மனதில் எழுவதை. அம்மா போல வாய்விட்டு வேண்டி இந்த குட்டிப் பயலிடம் மாட்டிக் கொண்டு விடக் கூடாது என்று மட்டும் மனதுக்குள் முடிச்சுப் போட்டு வைத்துக் கொண்டேன். பின்னே, அப்பனுக்கு இட்ட சட்டி தொங்குதடி அவரைப் பந்தலிலே என்றொரு பழமொழி இருக்கிறதல்லவா? செய்வினையெல்லாம் செயப்பாட்டு வினையாக மாறாதிருக்குமா என்ன? பீ கேர்ஃபுல்னு எனக்கு நானே சொல்லிகிட்டேன்.

Posted in Uncategorized | 1 Comment